काठमाडौं, १६ माघ। आत्मदाहबाट एक पुरुषलाई बचाउन खोज्दा जलेर घाइते भएकी एक महिलाको पोखरा स्वास्थ्य विज्ञान प्रतिष्ठानमा उपचारका क्रममा मृत्यु भएको छ।
पीडित पोखरा महानगरपालिका–१३ काहुनखोलाकी ३५ वर्षीया संगीता सापकोटा रहेको एकेडेमीका निर्देशक डा भरतबहादुर खत्रीले बताए।
आत्मदाह गर्ने प्रयास गर्ने व्यक्तिको प्रतिष्ठानमा उपचार भइरहेको छ। ‘उनी जनरल बेडमा छन् र आवश्यक परे आइसियु बेड ट्रान्सफर गर्न सकिन्छ,’ डा खत्रीले भने।
आफ्नै भाडामा रहेका ४५ वर्षीय कृष्णबहादुर क्षेत्रीलाई आत्मदाह गर्नबाट रोक्न खोज्दा सापकोटालाई गम्भीर चोट लागेको थियो। घटनाबारे थप अनुसन्धान भइरहेको जिल्ला प्रहरी कार्यालय कास्कीका सूचना अधिकारी सुवास तिमिल्सिनाले जानकारी दिए। (रासस)
