काठमाडौं, १३ साउन। रोटार्याक्ट क्लब अफ रुद्रमतीको २०औँ पदस्थापना कार्यक्रम सम्पन्न भएको छ ।
शनिबार न्यू सम्मिट कलेज शान्तिनगरमा उक्त पदस्थापना कार्यक्रम सम्पन्न भएको हो । पदस्थापना कार्यक्रमको प्रमुख आतिथ्यता रोटरी क्लब अफ रुद्रमती काठमाडौंका अध्यक्ष रोटारियन कृष्ण ढकालले गर्नु भएको थियो ।
त्यस्तै, मान्य अतिथिको रुपमा रोटरी इन्टरनेशनल डिस्टृक ३२९२ नेपाल-भुटानका आइपीडिआरआर रोटार्याक्टर रोशन कार्की रहनु भएको थियो । विशेष अतिथिको रूपमा डिस्टृकबाटै रोटार्याक्टर सुबिन खड्का रहनु भएको थियो ।
कार्यक्रम रोटार्याक्टर हेमन्त वलीको सन्चालनमा भएको हो । कार्यक्रममा स्वागत मन्तव्य रोटर्याक्टर राजु शर्माले दिनु भएको थियो । रोटरी वर्षकै प्रमुख कार्यक्रम मानिने पदस्थापना कार्यक्रममा चालू रोटरी वर्षको लागि नयाँ अध्यक्ष नियुक्त गरिन्छ ।
यस कार्यक्रममा रोटरी वर्ष २०२३/०२४ का लागि अध्यक्ष रहनु भएकि रोटार्याक्टर सिर्जना पोख्रेलले आफूमा रहेको अध्यक्षता रोटार्याक्टर सन्दिप पङ्गेनीलाई हस्तान्तरण गर्नु भएको हो ।
यससँगै रोटार्याक्टर सन्दिप पङ्गेनी रोटार्याक्ट क्लब अफ रुद्रमतीको अध्यक्षमा नियुक्त हुनु भएको हो । पङ्गेनीको कार्यकाल जुन,३० सम्म रहनेछ । नवनियुक्त पङ्गेनीले प्रमुख अतिथि रोटारियन कृष्ण ढकालबाट पदको सपथ ग्रहण गर्नु भएको थियो ।
कार्यक्रममा पङ्गेनीले आफ्नो बोर्ड अफ डिरेक्टर, यस वर्षको थिम प्रस्तुत गर्दै आगामी दिनमा रोटार्याक्ट क्लब अफ रुद्रमतीलाई अझ उचाइमा पुर्याउने प्रतिबद्धता व्यक्त गर्नुभयो ।
तत्कालीन अध्यक्ष रोटार्याक्टर सिर्जना पोख्रेलले आफ्नो कार्यकालमा गरेका कामहरूको विवरण प्रस्तुत गर्दै आफ्नो कार्यकालमा सहयोग पुर्याउने व्यक्तिहरूलाई अवार्डले सम्मान गर्नु भयो ।
उक्त कार्यक्रममा रोटार्याक्ट क्लब अफ रुद्रमतीमा नयाँ पाँच सदस्यले सदस्यता प्राप्त गरे । उक्त सदस्यहरूले सदस्यताको सपथ ग्रहण मान्य अतिथि रोटार्याक्टर रोशन कार्कीद्वारा लिएका हुन् ।
यसरी रोटार्याक्टर मन्जु पाठकको धन्यवाद ज्ञापनसँगै उक्त कार्यक्रम सम्पन्न भएको हो । यो कार्यक्रममा रोटार्याक्ट क्लब अफ रुद्रमतीकै पूर्व अध्यक्षहरू रमेश तिमिल्सिना, प्रकाश भुसाल, प्रियन्स पोख्रेल र नवराज पौडेलको समेत सहभागिता रहेको थियो ।
उक्त कार्यक्रममा उपत्यकाभित्रका विभिन्न रोटार्याक्ट क्लबहरूबाट ७० भन्दा बढी रोटार्याक्टरहरूको उपस्थिति रहेको थियो ।
