काठमाडौं, १८ जेठ। नेपाल र भारतबीच अन्तरराज्यीय विद्युतीय भुक्तानीसम्बन्धी सम्झौतामा हस्ताक्षर भएको छ।
प्रधानमन्त्री पुष्पकमल दाहाल ‘प्रचण्ड’को भारत भ्रमणका क्रममा आज नयाँ दिल्लीमा नेपाल क्लियरिङ हाउस र भारतको नेशनल पेमेन्ट कर्पोरेशन अफ इन्डियाबीच सम्झौतापत्रमा हस्ताक्षर भएको हो।
नेपाल क्लियरिङ हाउसका प्रमुख कार्यकारी अधिकृत निलेशमान प्रधान र नेसनल पेमेन्ट कर्पोरेशन अफ इन्डियाका प्रमुख कार्यकारी अधिकृत रितेश शुक्लाले समझदारी पत्रमा हस्ताक्षर गरेका छन्। नेशनल पेमेन्ट कर्पोरेशन अफ इन्डिया केन्द्रीय बैंक द्वारा स्थापित संस्था हो।
सम्झौतापछि भारतमा अध्ययन र उपचारका लागि आउनेलाई सहज हुनेछ। सम्झौताले सहज कारोबार र भुक्तानीका लागि मार्ग प्रशस्त गरेको छ।
सीईओ प्रधानले विद्युतीय भुक्तानीलाई सहज बनाउन महत्वपूर्ण सम्झौता भएको बताए। यसबाट नेपाल र भारतका नागरिक लाभान्वित हुने उनले बताए। (रासस)
