काठमाडौं, १८ कार्तिक। अविरल वर्षाका कारण साना जलविद्युत् आयोजनामा ठूलो क्षति पुगेपछि तीन सातादेखि अवरुद्ध भएको मुगु र हुम्लामा विद्युत् आपूर्तिको वैकल्पिक व्यवस्था नेपाल विद्युत प्राधिकरणले गरेको छ।
पहिरोले क्षतिग्रस्त विद्युत् आयोजना मर्मत नगरी सञ्चालनमा आउन नसकेपछि प्राधिकरणले मुगु र हुम्लामा विद्युत् आपूर्तिका लागि डिजेल जेनेरेटरको व्यवस्था गरेको छ।
प्राधिकरणका प्रबन्ध निर्देशक (एमडी) कुलमान घिसिङ, डेपुटी एमडी मनोज सिलवाल, कर्णाली क्षेत्रीय कार्यालयका प्रमुख शम्भु यादवसहितको टोली बुधबार जेनेरेटर लिएर सिमिकोट पुगेको थियो।
विद्युत् केन्द्रको पुनर्निर्माणमा अझै एक महिना लाग्ने भएकाले वैकल्पिक विद्युत् आपूर्तिका लागि जेनेरेटर र डिजेल हेलिकप्टरबाट ढुवानी भइरहेको घिसिङले बताए।
‘जेनेरेटरबाट बिजुली उत्पादन गर्दा प्रति युनिट ८० रुपैयाँभन्दा बढी खर्च लाग्ने भए पनि यहाँका अधिकांश उपभोक्ताले प्रतियुनिट न्युनतम ३० रुपैयाँ मात्रै तिर्नुपर्ने हुन्छ’, उनले भने।
यसको अर्थ दुई जिल्लामा जेनेरेटर सञ्चालन गर्दा प्राधिकरणले घाटा बेहोर्नु पर्ने हो।
तर, हरेक घरधुरीमा बिजुली पुर्याउने राज्यको दायित्व भएकाले लागतलाई ख्याल नगरी जेनेरेटरबाट विद्युत् आपूर्ति गरेका छौं,’ उनले भने।
प्राधिकरणका मुगुमा ३ हजार १ सय र हुम्लामा २ हजार ३ सय ग्राहक रहेका छन्।
कुलेखानी पावर स्टेशन र न्यू बुटवल सबस्टेसनबाट जेनेरेटर सिमिकोटमा लगिएको थियो, जसलाई सडकबाट मुगुको गमगढीसम्म पुगाइएको थियो।
हुम्लाको हकमा भने सडकले जोडिएको छैन भने गमगढीबाट डिजेल र जेनेरेटर हेलिकप्टरमार्फत सिमिकोट पुगाइएको थियो।
असोज १८ देखि २५ गतेसम्म परेको अविरल वर्षाका कारण पहिरो र बाढीले मुगुको ४ सय किलोवाट क्षमताको गमगढ र हुम्लाको ५ सय किलोवाटको हेलदुङ साना जलविद्युत आयोजनाको नहर भत्कँदा दुई जिल्लामा विद्युत् आपूर्ति पूर्णरुपमा अवरुद्ध भएको थियो।