काठमाडौं, १७ फागुन। नेपाली कांग्रेस र नेकपा एमाले दुवैले विपक्षी इजलासमा बस्न आग्रह गरेपछि बुधबारका लागि बोलाइएको प्रतिनिधिसभाको बैठक स्थगित भएको छ।
पुष २६ गते फ्लोर टेस्टमा पुष्पकमल दाहाल सरकारलाई मत दिए पनि प्रतिपक्षमा बसेको कांग्रेसले हालै सत्तारुढ गठबन्धन बनाए पनि प्रतिपक्षमा बस्ने जिद्दी गरेको छ।
एमालेले पनि सोमबार सरकारबाट समर्थन फिर्ता लिएपछी अहिले प्रतिपक्ष दल भएको भन्दै प्रतिपक्षमा बस्न जोड दिएको छ।
बुधबारका लागि बोलाइएको प्रतिनिधिसभाको बैठक दुई ठूला दलको विवादका कारण स्थगित भएको संसद स्रोतले जनाएको छ।
सङ्घीय संसद् सचिवालयले विज्ञप्ति जारी गर्दै नतोकिएको विशेष कारणले बैठक बस्न नसकेको भन्दै अर्को प्रतिनिधिसभाको बैठक चैत ५ गते बोलाइएको जानकारी दिएको छ।
