काठमाडौं, ११ माघ। गत साता पोखरामा दुर्घटना भएको यति एयरलाइन्सको उडान नम्बर ६९१ को ‘ब्ल्याक बक्स’ नेपालले सिंगापुर पठाउने निर्णय गरेको छ।
माघ १ मा पोखराको नयाँ अन्तर्राष्ट्रिय विमानस्थलमा अवतरण गर्नुभन्दा केही मिनेटअघि विमान दुर्घटना हुँदा विमानमा सवार सबै ७२ जनाको मृत्यु भएको थियो।
एक शव भने अझै बेपत्ता रहेको अधिकारीहरुले बताएका छन्।
पर्यटन मन्त्रालयका सहसचिव बुद्धिसागर लामिछानेले छानबिन आयोगका तीन सदस्यले ब्ल्याक बक्सलाई सिंगापुरको यातायात मन्त्रालयअन्तर्गतको वैधानिक बोर्ड यातायात सुरक्षा अनुसन्धान ब्यूरोमा लैजाने बताए।
ब्ल्याक बक्समा दुई प्रकारका रेकर्डिङ उपकरणहरू हुन्छन्- उडान डाटा रेकर्डर र ककपिट भ्वाइस रेकर्डर।
फ्लाइट रेकर्डर, जसलाई ब्ल्याक बक्स भनिन्छ, उड्डयन दुर्घटना र घटनाहरूको अनुसन्धानलाई सहज बनाउनको लागि विमानमा राखिएको इलेक्ट्रोनिक रेकर्डिङ उपकरण हो।
ब्ल्याक बक्स उज्यालो सुन्तला रंगमा चित्रित हुन्छन् र विमानको पुच्छर खण्डमा राखिन्छन्, जहाँ दुर्घटनाबाट बच्ने सम्भावना बढी हुन्छ।
‘हामी शुक्रबार सिंगापुर जाँदैछौँ। ककपिट भ्वाइस रेकर्डर र उडान डाटा रेकर्डरको परीक्षण गर्न कम्तिमा एक साता लाग्ने छ,’ टोलीमा रहेका आयोगका सदस्य सचिव लामिछानेले भने।
उडान डाटा रेकर्डरले इन्जिनका आवाजहरू, इन्स्ट्रुमेन्टल चेतावनीहरू र उडानको समयमा अन्य अडियो रेकर्डिङहरू सुरक्षित गर्दछ जबकि ककपिट भ्वाइस रेकर्डरले पाइलटहरूको कुराकानी सहित ककपिटमा ध्वनिहरू सुरक्षित गर्दछ।
ककपिट भ्वाइस रेकर्डरले पाइलटको हेडसेट र ककपिटको माइक्रोफोन र इयरफोनको संकेत रेकर्ड गर्दछ।
दुई देशबीच उड्डयन क्षेत्रमा सहयोग गर्ने समझदारी भएकाले ब्ल्याक बक्स सिंगापुर लैजाने निर्णय भएको लामिछानेले बताए।
‘सिङ्गापुरमा ब्ल्याक बक्सको जाँच नि:शुल्क हुन्छ,’ लामिछानेले भने।
अधिकारीका अनुसार ७२ शव मध्य ६० जनाको शव परिवारलाई बुझाइसकेको छ।
२२ जनाको शव पोखरामा बुझाइएको थियो भने बाँकी थप अनुसन्धान र पोष्टमार्टमका लागि माघ ४ गते काठमाडौं ल्याइएको थियो।
