काठमाडौं, १० माघ। विवादमा फसेको भर्खरै सम्पन्न नेपाल टी–२० लिगमा अनलाइन सट्टेबाजी र स्पट फिक्सिङमा विदेशीसहित १० जना संलग्न रहेको प्रहरीले जनाएको छ।
केन्द्रीय अनुसन्धान ब्यूरोले मंगलबार पत्रकार सम्मेलन गरी अनुसन्धानबाट चार नेपाली र ६ विदेशीको संलग्नता पत्ता लागेको जनाएको छ।
जनकपुर रोयल्सबाट खेल्ने क्रिकेटर मोहम्मद आदिल आलम (आदिल अन्सारी) ले स्पट फिक्सिङ योजनाअन्तर्गत कम्तिमा दुई खेलमा एक वाइड र नो-बल गरेको अनुसन्धानले देखाएको छ।
त्यस्तै केन्द्रीय अनुसन्धान ब्यूरोले पूर्व राष्ट्रिय खेलाडी महबुब आलमलाई स्पट फिक्सिङमा संलग्न भएको आरोप लगाएको छ। आलमले दुई नेपाली खेलाडीलाई फिक्सिङको प्रलोभनमा पारेको प्रहरीले जनाएको छ।
६ विदेशीमध्ये चार जना व्यवस्थापक, एक खेलाडी र एक बाहिरी व्यक्ति स्पट फिक्सिङ र लाइभ बेटिंगमा संलग्न रहेको प्रहरीले जनाएको छ।
केन्द्रीय अनुसन्धान ब्यूरोका अनुसार नाम नखुलाइएको विदेशी खेलाडीले टिम म्यानेजरको निर्देशनअनुसार स्पट फिक्सिङ योजनाअन्तर्गत खेलका क्रममा पूर्वनिर्धारित रन प्रहार गरेका थिए।
त्यसैगरी, केही फ्रेन्चाइज टोलीको आर्थिक स्रोत र खेलाडीलाई वितरण गरिएको पारिश्रमिकको स्रोत खुल्न नसकेको प्रहरीले जनाएको छ।
केन्द्रीय अनुसन्धान ब्यूरोले स्पट फिक्सिङमा व्यवस्थापकीय भूमिकामा रहेका केही व्यक्ति, खेलाडीसँग सम्पर्कमा रहेका व्यक्ति र खेलमा सहभागी खेलाडीसमेत संलग्न रहेको निष्कर्ष निकालेको छ।
विवादित नेपाल टी–२० लिगमा स्पट फिक्सिङमा संलग्न भएको आरोपमा प्रहरीले अनुभवी क्रिकेटर महबुब आलम र उदाउँदो स्टार मोहम्मद आदिल आलम (आदिल अन्सारी)लाई सोमबार पक्राउ गरेको छ।
नेपाल क्रिकेट संघ (क्यान) ले पुष ९ देखि पुष २७ सम्म आयोजना गरेको पहिलो फ्रेन्चाइज लिग स्पट फिक्सिङ खुलासा, म्याच फिक्सिङ र खेलाडीहरूलाई तिनीहरूको टोली मालिकहरू द्वारा भुक्तानी नदिँदा गहिरो समस्यामा परेको थियो।
राष्ट्रिय खेलकुद विकास ऐन, २०२० ले नेपालमा हुने खेल र विदेशी भूमिमा नेपालले खेलेका खेलहरूमा कुनै पनि प्रकारको म्याच फिक्सिङ र अनियमिततालाई निषेध गरेको छ।
ऐनको दफा ३३ बमोजिम अपराध गर्ने व्यक्तिलाई तीन वर्ष कैद, ५० हजार रुपैयाँ जरिवाना र कारोबार गरेको रकम जफत गर्ने व्यवस्था छ। यस्तो कसुर गर्न आदेश दिने, निर्देशन दिने, दुरुत्साहन गर्ने वा सहयोग गर्ने व्यक्तिलाई पनि मुख्य अपराधी सरह सजाय हुने ऐनमा उल्लेख छ।
नेपाली कानुनले सट्टेबाजीमा पनि रोक लगाएको छ। राष्ट्रिय दण्ड (संहिता) ऐन, २०१७ को धारा १२५ ले नेपालमा जुवा र सट्टेबाजीलाई निषेध गर्दछ।
