काठमाडौं, २७ मंसिर। बैंकिङ ठगी गरेको आरोपमा प्रहरीले काठमाडौंको पेस्पिकोलाबाट दुई जनालाई पक्राउ गरेको छ।
केन्द्रीय अनुसन्धान ब्यूरोबाट खटिएको प्रहरी टोलीले रामेछापका ३४ वर्षीय किशन कार्की र काभ्रेपलाञ्चोकका ४८ वर्षीय दीपककुमार काफ्लेलाई पक्राउ गरेको हो।
कार्कीलाई उच्च अदालत पाटनले मंसिर २२ गते पाँच दिन कैद र १५ लाख जरिवाना गरेको थियो। अदालतले ३१ जेठ २०७८ मा काफ्लेलाई ७ दिन कैद र ८ लाख ९० हजार जरिवाना तिर्न आदेश दिएको थियो। उनीहरु दुवैलाई बैंक खातामा पर्याप्त रकम नराखी चेक जारी गरी बैंकिङ ठगी गरेको अभियोगमा दोषी ठहर गरिएको थियो।
अदालतको आदेशपछि दुवै जना फरार थिए।
उनीहरुलाई फैसला कार्यान्वयनका लागि काठमाडौं जिल्ला अदालतमा पेश गरिएको छ।
