काठमाडौं, २१ मंसिर। नामिबियाले नेपाललाई २७६ रनको चुनौतीपूर्ण लक्ष्य दिएको छ।
आइसीसी विश्वकप लिग–२ अन्तर्गत नामिबियामा जारी नेपाल, नामिबिया र स्कटल्याण्डबीचको त्रिकोणीय एकदिवसीय शृंखलामा घरेलु टोलीले निर्धारित ५० ओभरमा ७ विकेट गुमाएर २७५ रन बनाएको छ।
टस हारेर पहिले ब्याटिङको निम्तो पाएको नामिबियाका लागि मिचेल भान लिङ्गेनले सतकीय पारी खेले। १११ बल खेलेका उनले १ छक्का र १५ चौकासहित ११९ रन बनाए।
यस्तै कप्तान जेरार्ड इरास्मसले ५३ रन बनाए। ७६ बल खेलेका उनले २ छक्का र १ चौका प्रहार गरे। जान निकोलले ४० रन बनाए।
नेपालका लागि ललित राजवंशीले सर्वाधिक ४ विकेट लिए। सोमपाल कामीले २ तथा सागर ढकालले १ विकेट लिए।
यसअघि सिरिजको दोस्रो खेलमा नेपाल स्कटल्याण्डसँग ३ विकेटले पराजित भएको थियो। पहिलो खेल वर्षाले अवरुद्ध भएको थियो।
२७६ रनको चुनौतीपूर्ण लक्ष्य पछ्याएको नेपालले हाल चार ओभर सकिदा १ विकेट गुमाउदै १४ रन हानेको छ।
