काठमाडौं, २९ कार्तिक। निर्वाचन आचारसंहिता उल्लंघन गरेको भन्दै निर्वाचन आयोगले बाँकेका नौ उम्मेदवारसँग स्पष्टीकरण मागेको छ।
उनीहरुले मतदातालाई रिझाउने प्रयासमा, ब्यानर लगाएर र निर्वाचनको आचारसंहिता नमान्ने गरी चामल बाँडेको जिल्ला आचारसंहिता अनुगमन अधिकृत खडानन्द अधिकारीले जानकारी दिए।
प्रतिनिधिसभाका स्वतन्त्र उम्मेदवार दिवाकर खनाल र बागेश्वर चौलागाईं र राप्रपा नेपाल, सद्भावना पार्टी र जनता समाजवादी पार्टीका उम्मेदवारलाई स्पष्टीकरण दिन भनिएको छ।
जिल्ला कोष नियन्त्रक कार्यालयका प्रमुखसमेत रहेका अधिकारीले आचारसंहिता उल्लङ्घन गर्नेलाई कारबाही गर्ने चेतावनी दिँदै गैरकानूनी माध्यमबाट मतदातालाई प्रभावित नपार्न राजनीतिक दल र उम्मेदवारलाई आग्रह गरिएको बताए।
