काठमाडौं, ३० असोज। ट्राफिक प्रहरीले काठमाडौं उपत्यकामा चर्को स्वरमा मोटरसाइकल चलाउनेलाई कारबाही थालेको छ। यसले ध्वनी प्रदुषण मात्र नभई मोटर वाहन तथा यातायात व्यवस्था ऐनको प्रावधानविपरीत भएको उनीहरुको चेतावनी छ।
काठमाडौं उपत्यका ट्राफिक प्रहरी कार्यालयका अनुसार चर्को आवाज निकाल्ने सातवटा मोटरसाइकललाई आज थप अनुसन्धान र कानुनी कारबाहीका लागि नियन्त्रणमा लिएको छ। उपत्यकाका बासिन्दाहरूले सडक प्रयोगकर्ताहरूलाई आतंकित गर्ने यस्ता दुईपाङ्ग्रे सवारीसाधनहरू विरुद्धको गुनासोपछि यो कारबाही गरिएको हो।
यस्ता मोटरसाइकलका साइलेन्सर फ्याक्ट्रीले बनाएको हो कि परिमार्जन गरेको हो भनेर पत्ता लगाउन ट्राफिक प्रहरीले कारबाही गरिरहेको एसपी अवदेश विष्टले बताए।
धेरै फेन्सी मोटरसाइकलको साइलेन्सर प्रचलित कानूनको उल्लङ्घन गरी परिमार्जन गरिएको पाइएको छ।
कुनै पनि सवारी साधनको मौलिक आकारको मेकानिकल परिमार्जन कानून बमोजिम दण्डनीय छ। चर्को आवाज निकाल्ने बाइकले ध्वनी प्रदुषणमा योगदान पुर्याईरहेको छ।
ट्राफिक प्रहरीका एक अधिकारीले भने, “कुनै बाइकको ध्वनि स्तर ८४ डेसिबल अधिकतम सीमाको हुनु पर्नेमा ११० डेसिबलभन्दा बढी थियो।”
ध्वनि प्रदूषण एक गम्भीर शहरी समस्या बनेको छ। उपत्यकाका धेरै ठाउँहरूमा विश्व स्वास्थ्य संगठनले तोकेको सामुदायिक आवाज दिशानिर्देशहरू भन्दा बढी छन्।
केन्द्रीय तथ्याङ्क विभागले हालै सार्वजनिक गरेको नेपालको वातावरणीय तथ्याङ्क अनुसार अधिकांश ट्राफिक क्षेत्रहरूमा दिउँसो सडकको आवाजको लागि ७० डेसिबलको सीमा वा अनुमति प्राप्त स्तर नाघेको छ। मानव कानले २६ डेसिबलसम्मको आवाज मात्र सहजै सहन सक्छ, विश्व स्वास्थ्य संगठनले जनाएको छ।
