काठमाडौं, १९ साउन। काठमाडौंका लागि उडेको श्री एयरलाइन्सको विमान इन्जिनबाट धुवाँ निस्किएपछि नेपालगन्ज फर्किएको छ। 9N-ANF-432 कल साइन भएको विमानभित्र धुवाँ निस्कन थालेपछि पाईलटले आकस्मिक अवतरण गराएका थिए।
बिहीबार बिहान ९ः३० बजे उडेको विमानको इन्जिनबाट एक्कासी धुवाँ निस्किएपछि आकस्मिक अवतरण गरिएको श्री एयरलाइन्सका नेपालगन्ज स्टेशन प्रमुख परशुराम चौधरीले जानकारी दिए। नेपालगन्ज विमानस्थलबाट उडान भरेको करिब ७ मिनेटपछि १० माइल उडेको विमानले आकस्मिक अवतरण गरेको उनले बताए।
७९ यात्रु र चालक दलका चार सदस्यसहित बिहीबार बिहान ९:३० मा काठमाडौंका लागि उडेको विमानले इन्जिनबाट धुवाँ निस्किएपछि नेपालगन्जमा आकस्मिक अवतरण गर्नु परेको हो।
जहाजमा रहेका सबै यात्रुहरूलाई सुरक्षित रूपमा बाहिर निकालिएको छ र विमान अहिले पार्किङ गरिएको छ। चौधरीले काठमाडौंबाट प्राविधिक जनशक्तिसहितको टोली आएर विमान जाँच गरेपछि मात्रै कारण थाहा हुने बताए ।
