काठमाडौं, ४ जेठ। प्रधानमन्त्री पुष्पकमल दाहाल ‘प्रचण्ड’ले क्यान्टोनमेन्टमा भ्रष्टाचार भएको हल्ला निराधार, काल्पनिक र दुष्ट भएको भन्दै खण्डन गरेका छन्।
प्रतिनिधिसभाको आजको बैठकमा प्रधानमन्त्री प्रचण्डले सांसदहरुको जिज्ञासालाई सम्बोधन गर्दै विशेषगरी गिरिजाप्रसाद कोइराला प्रधानमन्त्री र डा रामशरणले पदभार ग्रहण गरेकाले शिविरमा भएको भ्रष्टाचारमा आफूलाई जोड्नु निराधार भएकोमा जोड दिए। महत त्यतिबेला अर्थमन्त्री थिए।
“शिविरमा राखिएका लडाकुलाई बाँडफाँड गरेको रकममा भ्रष्टाचार भएको प्रमाणित भए जेल जान तयार छु, सार्वजनिक रुपमा आएका सबै घुसका घटनाको छानबिन गर्न पनि तयार छु” प्रधानमन्त्री प्रचण्डले भने।
सो अवसरमा प्रधानमन्त्रीले जनयुद्ध र जनआन्दोलनका क्रममा घाइते वा अपाङ्गता भएकाहरुको पुनःस्थापना र परिपूर्तिलाई सरकारले प्राथमिकतामा राखेको बताउनुभयो।
प्रधानमन्त्री प्रचण्डले सङ्क्रमणकालीन न्याय र शान्ति प्रक्रियाका बाँकी काम पूरा गर्न सरकार लागिपरेको बताउँदै यस विषयमा बृहत् राजनीतिक समझदारीका लागि पहल भइरहेको बताए।
उनले सङ्क्रमणकालीन न्यायसम्बन्धी विधेयकलाई सहमतिका आधारमा टुङ्ग्याउन प्रमुख राजनीतिक दलबीच समझदारी भएको बताए।
