काठमाडौँ, २ साउन। काठमाडौं उपत्यकाको मुख्य प्रवेशद्वार नागढुंगामा सवारीसाधनको स्क्यानिङ र अभिलेख राख्न उच्च प्रविधियुक्त उपकरण जडान गरिने भएको छ।
अहिले ट्राफिक प्रहरीले दैनिक काठमाडौं उपत्यका भित्रिने र बाहिरिने सवारी साधनको हातले लेखेर तथ्यांक राख्ने गरेको छ। ट्राफिक प्रहरीले मुख्य नाकामा शंकास्पद सवारीसाधन र यात्रुलाई तदर्थ रुपमा चेकजाँच गरिरहेको छ।
चन्द्रागिरि नगरपालिकाले पहिलो पटक संघीय राजधानी प्रवेश गर्ने मुख्य नाकामा सवारी साधन स्क्यानिङ मेसिन राख्ने तयारी तीव्र पारेको जानकारी दिएको छ।
यस सम्बन्धमा नगरपालिकाले पहिलो चरणमा नेपाल प्रहरी र सडक विभागका उच्च पदस्थ अधिकारीलगायत सरोकारवालासँग छलफल गरेको थियो।
‘काठमाडौं उपत्यकाको सुरक्षाको दृष्टिकोणले नागढुंगामा सवारी साधन स्क्यानिङ मेसिन राख्न जरुरी भइसकेको छ’, चन्द्रागिरिका मेयर घनश्याम गिरीले अहिलेको डिजिटल युगमा ट्राफिक प्रहरीले कागजमा कति समयसम्म तथ्यांक राख्ने बताए।
मेसिनले सवारीसाधनसँगै व्यक्ति (हरू) स्क्यान गर्न र आवश्यकता अनुसार तिनीहरूको अभिलेख राख्न प्रयोग गर्न सकिन्छ। यसले शान्ति सुरक्षा कायम गर्न र ट्राफिक व्यवस्थापनको भार कम गर्न मद्दत गर्ने अपेक्षा गरिएको छ।
स्क्यानिङ मेसिनको लागत करिब रु दुई करोड ५० लाख रहेको छ। मेसिन खरिदका लागि नगरपालिकाले उपत्यकाका अन्य नगरपालिका र सरोकारवालासँग सहकार्य गर्न आग्रह गरेको उनले बताए।
“यो चन्द्रागिरिको लागि मात्र आवश्यक छैन। यसले उपत्यकाका सबै नगरपालिका र संघीय सरकारलाई पनि मद्दत गर्नेछ। यसले सुचारु ट्राफिक व्यवस्थापन र सुरक्षा सुनिश्चित गर्ने अपेक्षा गरिएको छ,” मेयर गिरीले थपे।
