काठमाडौं, ७ पुष। अबदेखि काठमाडौं उपत्यकाबाट छुट्ने यात्रुबाहक बसहरू रातभरि पार्किङ गरी गोङ्गबुस्थित नयाँ बसपार्कबाट निस्कनुपर्नेछ।
सडक दुर्घटना र ट्राफिक जाम कम गर्न यो कदम चालेको काठमाडौं उपत्यका ट्राफिक प्रहरी कार्यालयका प्रवक्ता वरिष्ठ प्रहरी उपरीक्षक राजेन्द्रप्रसाद भट्टले बताए।
यसअघि उपत्यकाबाट चाबहिल, गौशाला, कोटेश्वर, कलङ्की, गोंगबु, माछापोखरीलगायत उपत्यकाका विभिन्न स्थानबाट रात्रिकालीन यात्रुवाहक बस छुट्ने गरेको थियो। अन्यत्र जथाभावी पार्किङ गर्दा ट्राफिक जाम र सडक दुर्घटना हुने गरेको उनले बताए।
उपत्यकाबाट विभिन्न स्थानबाट राति छुट्ने यात्रुवाहक सवारी साधनले ट्राफिक जाम हुने गरेकोले यस्तो नयाँ व्यवस्था गरिएको उनले बताए। नेपाल यातायात व्यवसायी राष्ट्रिय महासंघका अध्यक्ष विजयबहादुर स्वारले यातायात क्षेत्रले जनतालाई सहज रुपमा सेवा दिनुपर्नेमा जोड दिनुभयो। “बसपार्कबाट रात्रिकालीन यात्रुवाहक सवारीसाधन छुटाउन यातायात व्यवसायीलाई कुनै चिन्ता छैन। यात्रुहरूका लागि पिक एण्ड ड्रप सेवालाई व्यवस्थित रूपमा व्यवस्थित गर्न सके राम्रो हुनेछ।”
रिङरोडका यात्रुलाई ओसारपसार गरि बसपार्क सम्म ल्याउने व्यवस्था मिलाउनुपर्ने, उनको माग थियो।
उनले ट्राफिक नियम उल्लङ्घन गर्नेलाई ५ सय रुपैयाँबाट १ हजार ५ सय रुपैयाँसम्म जरिवाना बढाएकोमा पनि चिन्ता व्यक्त गरे।
यस क्षेत्रलाई व्यवस्थित गर्न पूर्ण अधिकृत यातायात प्राधिकरण गठन गर्नुपर्ने उनको भनाइ छ। बसपार्कको पार्किङस्थलमा एक पटकमा २ हजारभन्दा बढी सवारी साधन पार्किङ गर्ने क्षमता रहेको छ। काठमाडौं महानगरपालिका र ल्होत्से बहुउद्देश्यीय प्रालिबीच २०५६ सालमा १६१ रोपनी जग्गामा पार्किङ गर्ने सम्झौता भएको थियो। सार्वजनिक निजी साझेदारी लि. अन्तर्गत यात्रुवाहक बसहरू बसपार्कबाट ६० भन्दा बढी जिल्लाका लागि छुट्छन्।
