काठमाडौं, २३ मंसिर। काठमाडौंको सुन्दरीजलमा ल्याइएको मेलम्ची खोलाको पानी आजदेखि राजधानीमा वितरण हुँदैछ। सिन्धुपाल्चोक जिल्लाको हेलम्बु गाउँपालिका–१ स्थित मेलम्ची खोलाको मुहान अम्बाथानमा सुरुङमार्गबाट पानी खसालिएको हो।
नालीमा छोडेको पानी मङ्सिर १८ गते गोकर्णेश्वर नगरपालिका–१ सुन्दरीजलमा सुरुङको अन्तिम विन्दुमा पुगेको थियो।
“मेलम्ची क्षेत्रमा ठूलो पहिरोले अम्बाथानको मुहानमा रहेको सुरुङको संरचनामा क्षति पुगाएपछि गत असारमा सुरुङ बन्द भएको थियो, त्यसैले सुरुङमा भरिएको पानी बगमती नदीमा छाडिएको छ। सुरुङमा भग्नावशेष छ,’ मेलम्ची खानेपानी आयोजनाका इन्जिनियर रामचन्द्र पौडेलले भने।
उनका अनुसार मंसिर १९ गतेदेखि सुरुङमा पानी भरिएको र बिहीबारदेखि सुरुङमा भरिएको पानी महांकालचौर शाखामा छाडिएको छ। लामो समयदेखि सुरुङमार्ग बन्द भएपछि परीक्षणका आधारमा सुरुङको नालीमा थोरै मात्रामा मात्रै पानी पठाइएको थियो। यो पानी सुन्दरीजल पुग्न एक साता लागेको थियो।
आयोजनाका प्रवक्ता राजेन्द्र पन्तले मेलम्ची खोलाबाट दैनिक १७ करोड ५० लाख लिटर पानी सुरुङमा छाड्ने बताए।
आयोजनाले गत चैत १४ गतेदेखि काठमाडौंमा मेलम्चीको पानी वितरण सुरु गरेको थियो। तर, असार १ गते सिन्धुपाल्चोकमा आएको बाढी र पहिरोले आपूर्ति अवरुद्ध भएको थियो।
खानेपानी मन्त्री उमाकान्त चौधरीले महांकालचौर खानेपानी ट्याङ्कीबाट मेलम्चीको पानी वितरणको आज उद्घाटन गर्ने कार्यक्रम छ।
