काठमाडौं, ९ माघ। विवादमा परेको नेपाल टी–२० लिगमा म्याच फिक्सिङ र स्पट फिक्सिङ गरेको आरोपमा प्रहरीले दुई क्रिकेटरलाई पक्राउ गरेको छ।
केन्द्रीय अनुसन्धान ब्यूरोको टोलीले सोमबार बिहान क्रिकेटर मोहम्मद आदिल अन्सारी र महबुब आलमलाई पक्राउ गरेको हो।
गृह मन्त्रालयको निर्देशनपछि लिगमा फिक्सिङको आरोपमा ब्यूरोले छानबिन गरिरहेको छ।
राष्ट्रिय क्रिकेटका पूर्व कप्तान ज्ञानेन्द्र मल्लले आफ्ना एक सहकर्मीलाई म्याच फिक्सिङ योजनामा सम्पर्क गरेको खुलासा गरेपछि लिग विवादमा तानिएको थियो।
मल्लका अलावा प्रतियोगिताका आधिकारिक कमेन्टेटरहरूमध्ये एक सचिन तिमिल्सेनाले पनि कमेन्टेटरको रूपमा काम गर्दा र खेललाई नजिकबाट हेर्दा शंकास्पद गतिविधि भइरहेको पाएको आफ्नो फेसबुक पोस्टमार्फत खुलासा गरेका थिए।
नेपालका सात वा आठ खेलाडीले म्याच फिक्सिङ अफरको बारेमा अन्तर्राष्ट्रिय क्रिकेट काउन्सिल एन्टी करप्सन युनिटमा रिपोर्ट गरेका थिए।
म्याच फिक्सिङ, स्पट फिक्सिङ र सट्टेबाजीको आरोप लागेपछि अन्तर्राष्ट्रिय क्रिकेट काउन्सिलको दुई सदस्यीय प्रतिनिधि टोली नेपाल आएको थियो।
अख्तियार दुरुपयोग अनुसन्धान आयोगले काउन्सिलको स्वीकृतिविना प्रतियोगिता आयोजना भएको र श्रम स्वीकृतिबिना प्रतियोगितामा सहभागी हुने विदेशी खेलाडीको पारिश्रमिकको विषयमा स्पष्टिकरण माग गर्दै राष्ट्रिय खेलकुद परिषद्लाई पत्राचार गरेको थियो।
