काठमाडौं, २९ पुष। तीन महिनाभन्दा बढी समय जेलमा बिताएपछि स्टार क्रिकेटर तथा राष्ट्रिय क्रिकेट टोलीका पूर्व कप्तान सन्दीप लामिछाने आज धरौटीमा रिहा हुँदैछन्। उच्च अदालत पाटनले उनलाई २० लाख धरौटीमा रिहा गर्न आदेश दिएको हो।
न्यायाधीश ध्रुवराज नन्द र रमेश ढकालको संयुक्त इजलासले २५ वर्षीय लामिछानेलाई कारागारबाट बाहिरै बसेर कानुनी लडाई लड्न अनुमति दिएको हो।
जबर्जस्ती करणीको आरोप लगाउने युवतीसँग सम्पर्क नगर्ने र आँफु फरार पनि हुने आश्वासन दिएपछि अदालतले लामिछानेलाई जमानत दिएको हो।
लामिछानेको तर्फबाट अधिवक्ता सरोज घिमिरेले अदालतले लामिछानेलाई नेपाल बाहिर जान रोक लगाएको बताए। वास्तवमा उनले काठमाडौं उपत्यका छाड्न समेत जिल्ला प्रशासन कार्यालयबाट विशेष अनुमति लिनुपर्नेछ। यदि उनले यी प्रतिबन्धहरू मध्ये कुनै पनि उल्लङ्घन गरेमा, प्रहरीले उसलाई पुन: पक्राउ गर्न सक्छ। यसबाहेक, उनको मोबाइल फोनमा कुराकानी अनुसन्धान अधिकारीहरूले रेकर्ड गर्नेछ। मिडियालाई समेत यस मुद्दामा टिप्पणी गर्न प्रतिबन्ध लगाइएको छ र अधिवक्ताहरूलाई मिडियासँग कुनै पनि जानकारी साझा नगर्न भनिएको छ।
कार्तिक १८ गते काठमाडौं जिल्ला अदालतले उनलाई ‘उपलब्ध प्रारम्भिक प्रमाणले अदालतले निर्दोष भएको निष्कर्ष निकाल्न नसकेको देखाउँदै अन्तिम फैसला नभएसम्मका लागि थुनामा पठाएको थियो। त्यसपछि लामिछानेले धरौटी माग्दै उच्च अदालत पुगेका थिए।
काठमाडौं जिल्ला अदालतले पीडितका वकिलले पेस गरेका प्रमाणहरु जस्तै लामिछाने काठमाडौं इन प्रवेश गरेको सीसीटीभी फुटेज, ‘हाइमेन च्यातिएको’ उल्लेख गरेको पीडितको मेडिकल रिपोर्ट, पीडितले लगाएको आरोपसँग मेल खाने होटल कर्मचारीको बयान, स्न्यापच्याटमा लामिछाने र पीडितले आदानप्रदान गरेको सन्देश र प्रहरीले होटलबाट बरामद गरेको कागजात जस्ता प्रमाणहरु हेरेको थियो।
अर्कोतर्फ प्रतिवादीले लामिछानेले बालिकालाई बलात्कार गरेको कुनै प्रमाण नभएको भन्दै लामिछानेले रात टेबुलमा बिताएर युवतीलाई ओछ्यानमा सुत्न लगाएको तर्क गरेका थिए।
भदौ २१ गते नाबालिग बालिकाले अभिभावकसहित लामिछानेविरुद्ध गौशाला प्रहरी वृत्तमा उजुरी दिएकी थिइन्। उनले भदौ ५ गते राति काठमाडौंको सिनामंगलस्थित काठमाडौं इन नामक होटलमा बलात्कार गरेको आरोप लगाएकी थिइन्।
युवतीले आफूलाई दुई पटक बलात्कार गरेको आरोप लगाएकी थिइन्। यौन सम्पर्क गर्न नमान्दा लामिछानेले कुटपिट समेत गरेको एफआइआरमा उल्लेख छ।
सीसीटीभी फुटेजमा दुवै जना भोलिपल्ट बिहान होटलबाट निस्किएका थिए। लामिछाने सोही दिन नैरोबीमा हुने क्रिकेट टी–२० सिरिजमा सहभागी हुन केन्या प्रस्थान गरेका थिए। त्यहाँबाट उनी क्यारेबियन प्रिमियर लिग खेल्न वेस्ट इन्डिज गएका थिए।
बलात्कारको आरोप लाग्दा लामिछाने राष्ट्रिय क्रिकेट टोलीका कप्तान थिए। पक्राउ पुर्जी जारी भएपछि नेपाल क्रिकेट संघले उनलाई राष्ट्रिय टोलीबाट निलम्बन गरेको थियो।
कति गते के भयो?
• भदौ २१: नाबालिग बालिकाले अभिभावकसहित लामिछानेविरुद्ध गौशाला प्रहरी वृत्तमा उजुरी दिएकी थिइन्। उनले भदौ ५ गते राति काठमाडौंको सिनामंगलस्थित काठमाडौं इन नामक होटलमा बलात्कार गरेको आरोप लगाएकी थिइन्।
• भदौ २३: काठमाडौं जिल्ला अदालतले उनीविरुद्ध पक्राउ पुर्जी जारी गरेको थियो। सोही दिन नेपाल क्रिकेट संघले लामिछानेलाई टोलीबाट निलम्बन गरेको थियो।
• भदौ २४: क्यारेबियन प्रिमियर लिगमा भाग लिएर वेस्ट इन्डिजमा रहेका लामिछानेले फेसबुकमा आफूले सीपीएल टोली छाड्ने, नेपाल फर्कने, प्रहरीसमक्ष आत्मसमर्पण गर्ने र आफूलाई आरोपबाट मुक्त गर्न कानुनी सहयोग खोज्ने लेखेका थिए।
• भदौ २६: अध्यागमन विभागले प्रहरीलाई सहयोग गर्न लामिछानेलाई विमानस्थलमा पक्राउ गर्न कालोसूचीमा राख्यो।
• असोज ९: लामिछानेले आफू मानसिक रूपमा विचलित भएको र चाँडै नेपाल फर्किने दाबी गर्दै फेसबुकमा अर्को पोस्ट लेखे।
• असोज १०: नेपाल प्रहरीले सबै इन्टरपोल सदस्य राष्ट्रहरूलाई लामिछाने पत्ता लगाउन र नेपाल ल्याउन मद्दत गर्न आग्रह गर्दै डिफ्युजन नोटिस जारी गरेको थियो।
• असोज २०: लामिछानेलाई त्रिभुवन अन्तर्राष्ट्रिय विमानस्थलबाट पक्राउ गरियो।
• असोज २४, २७, कार्तिक २, ६: अदालतमा लामिछानेको सुनुवाइ जारी रह्यो र अदालतले धरौटी अस्वीकार गरिरह्यो।
• कार्तिक १४: सरकारी वकिलले लामिछानेविरुद्ध नाबालिग बलात्कारको मुद्दा दायर गर्दै १० देखि १२ वर्ष कैदको माग गरे।
• कार्तिक १८: लामिछानेलाई मुद्दाको अन्तिम फैसला नभएसम्मका लागि न्यायिक हिरासतमा पठाइयो।
• पुष २८: पाटन उच्च अदालतले २० लाख धरौटीमा रिहा गर्न आदेश दियो।
