काठमाडौं, ३ पुष। पृथ्वी राजमार्गको मुग्लिन–पोखरा सडकखण्डको आँबुखैरेनी गाउँपालिका–२ खानीखोलामा आइतबार बिहान सडक भासिएपछि सवारी आवागमन अवरुद्ध भएको छ।
चौडा गर्ने क्रममा सडक भासिएपछि बिहान १० बजे सवारी आवागमन ठप्प भएको इलाका प्रहरी कार्यालय आबुखैरेनीले जनाएको छ।
एउटा पुलमा पनि क्षति पुगेको प्रहरी नायब उपरीक्षक युवराज खड्काले जानकारी दिँदै हलुका सवारी साधनलाई वैकल्पिक मार्गबाट डाइभर्ट गरिएको बताए।
मर्मतको काम भइरहेको र दुईतर्फी यातायात सुचारु हुन केहि समय लाग्ने उनले बताए।
अवरुद्ध भएपछि सयौं यात्रु अलपत्र परेका छन्।
सडकखण्डलाई चार लेनमा फराकिलो बनाउने काम सुस्त गतिमा भइरहेको छ। गत वर्षदेखि काम सुरु भए पनि अपेक्षित प्रगति हुन सकेको छैन।
८० किलोमिटर सडकलाई दुई भागमा विभाजन गरी आबुखैरेनी–जमुने (४१ किलोमिटर) पूर्व र जमुने–पोखरा (३९ किमी) पश्चिम भागमा विभाजन गरी सडक विस्तारको काम भइरहेको छ।
गण्डकी प्रदेशको लाइफलाइन पृथ्वी राजमार्गको महत्वपूर्ण खण्ड मुग्लिन–पोखरा सडकखण्ड ८८ किलोमिटर छ जसमध्ये आबुखैरेनी–पोखरा खण्डले ८० किलोमिटर ओगटेको छ।
सडक विभाग आयोजना निर्देशनालयले निर्माण कम्पनीसँग २०७८ जेठ ३ गते पश्चिम खण्ड निर्माणका लागि सम्झौता गरेको थियो।
