काठमाडौं, २५ मंसिर। कतारमा जारी फिफा विश्वकपको सेमिफाइनलको समीकरण पूरा भएको छ। आइतबार बिहान भएको अन्तिम क्वाटरफाइनल खेल सकिएसँगै विश्वकपको अन्तिम चारमा पुग्ने सबै टोलीको टुंगो लागेको छ।
यस विश्वकपमा अर्जेन्टिना र मोरक्को पूर्व विजेता फ्रान्स र उपविजेता क्रोएसियासँगै सेमिफाइनलमा पुगेका छन्।
पहिलो सेमिफाइनलमा अर्जेन्टिना र क्रोएसिया साथै दोस्रो सेमिफाइनलमा फ्रान्स र मोरक्को भिड्नेछन्। मंगलबार राति १२:४५ मा अर्जेन्टिना र क्रोएसियाबीचको खेल हुनेछ। क्वाटरफाइनलमा अर्जेन्टिनाले नेदरल्याण्ड्सलाई र क्रोएसियाले ब्राजिललाई पेनाल्टी सुटआउट हराएर सेमिफाइनलमा स्थान बनाएका थिए।
त्यस्तै दोस्रो सेमिफाइनल मोरक्को र फ्रान्सबीच बुधबार राति १२:४५ मा हुनेछ।
गएराति भएको तेस्रो क्वाटरफाइनल खेलमा मोरक्कोले पोर्चुगललाई १-० ले पराजित गरेको हो। यस्तै साविक विजेतासमेत रहेको फ्रान्सले कतारको अलबेयत मैदानमा भएको अन्तिम क्वाटरफाइनलमा इङ्ल्यान्डलाई २–१ गोलले हराउँदै अन्तिम चारमा पुगेको हो।
फाइनल खेल पुस ३ गते आइतबार हुनेछ।
