काठमाडौं, २३ भदौ। युएईमा जारी एसिया कप क्रिकेटको सुपर फोरको खेलमा पाकिस्तानले अफगानिस्तानलाई पराजित गरेको छ। बुधबार राति सर्जाह क्रिकेट स्टेडियममा भएको रोमाञ्चक खेलमा पाकिस्तानले अफगानिस्तानलाई १ विकेटले पराजित गरेको हो।
जितका लागि १३० रनको विजयी लक्ष्य पछ्याएको पाकिस्तानले १९.२ ओभरमा ९ विकेट गुमाएर पूरा गर्यो। पाकिस्तानलाई अन्तिम ६ बलमा ११ रन आवश्यक थियो। अन्तिम ओभरको दोश्रो बल प्रहार गर्दै पाकिस्तानले ९ विकेटको क्षतिमा १३० रनको विजयी लक्ष्य पुरा गरेको थियो। पाकिस्तानका नसिम शाहले अन्तिम ओभरको दुवै बलमा छक्क प्रहार गरेका थिए।
पाकिस्तानको जितमा शादब खानले २६ बलमा १ चौका र ३ छक्का प्रहार गर्दै सर्वाधिक ३६ रनको योगदान दिए। चौथो विकेटका लागि खान र इफ्तिखारले ४१ बलमा ४२ रनको साझेदारी गर्दै स्पिनरको ओभर निकालेका थिए।
त्यसअघि सर्जाह क्रिकेट स्टेडियममा टस हरेर पहिले ब्याटिङ गरेको अफगानिस्तानले निर्धारित २० ओभरमा ६ विकेट गुमाएर १२९ रन बनाएको थियो।
अफगानिस्तानका लागि इब्राहिम जाद्रानले ३७ बलमा दुई चौका र एक छक्का प्रहर गर्दै टिमका लागि सर्वाधिक ३५ रन जोडेका थिए। त्यस्तै हजरतुल्लाह जाजईले १७ बलमा चार चौकाको प्रहर गर्दै २१ रन र रहमानउल्लाह गुरबाजले ११ बलमा दुई छक्का प्रहर गर्दै १७ रन जोडेका थिए।
पाकिस्तानको यो जित संगै पाकिस्तान र श्रीलंका फाइनलमा पुगेका छन भने भारत सुपर फोरबाट बाहिरिएको छ। अफगानिस्तान र भारत एक खेल खेल्न बाँकी छदै सुपर फोरबाट बाहिरिएका छन्।
