काठमाडौं, २५ असोज। युक्रेनका चार क्षेत्रलाई रुसले गाभ्ने विषयमा संयुक्त राष्ट्र संघको महासभामा महत्वपूर्ण मतदान हुनुभन्दा केही घण्टा अघि, मध्यपूर्व, दक्षिण एसिया र संयुक्त अधिराज्यको विदेश, राष्ट्रमण्डल र विकास कार्यालयका राज्यमन्त्री लर्ड अहमदले प्रधानमन्त्री शेरबहादुर देउवालाई विलयको विपक्षमा मतदान गर्न आग्रह गरेका थिए।
गत मङ्गलबार रुसी संसदले युक्रेनको डोनेस्क, लुहान्स्क, खेरसोन र जापोरिज्जिया क्षेत्रलाई गाभ्ने कानुनलाई सर्वसम्मतिले अनुमोदन गरेको थियो।
देउवा र अम्हादबीचको भर्चुअल बैठक सोमबार रुसी क्षेप्यास्त्र आक्रमणले कीभलगायत युक्रेनका शहरहरूलाई लक्षित गरेको केही घण्टापछि भएको हो। मिडिया रिपोर्टहरूका अनुसार रुसी आक्रमणमा कम्तिमा ११ युक्रेनी मारिएका छन् र धेरै घाइते भएका छन्।
त्यसैगरी अमेरिकी अधिकारीहरूले पनि युक्रेनलाई लिएर रुसलाई समर्थन गर्ने प्रयासमा रहेका नेपाली अधिकारीहरूसँग सम्पर्क गर्ने प्रयास गरिरहेको बताइएको छ।
युक्रेनमा रुसको आक्रमणको विरोधमा अडान लिन काठमाडौंलाई पश्चिमा मुलुकबाट निरन्तर दबाब दिँदै आएको छ । अमेरिकाको अग्रपंक्तिमा रहेको बेलायत, काठमाडौंस्थित युरोपेली प्रतिनिधिमण्डल र प्रजातान्त्रिक गुटमा आबद्ध देशहरूले न्युयोर्क, जेनेभामा संयुक्त राष्ट्रसंघको भोटमा सबै प्रकारका रुसी आक्रमणको भत्र्सना गर्न देउवा सरकारलाई निरन्तर दबाब दिइरहेका छन्।
‘रुसको कदममाथि मङ्गलबार बिहान वा बुधबार साँझ (नेपाली समय) न्यूयोर्कमा हुने संयुक्त राष्ट्रसंघको महासभामा मतदान हुनसक्छ,’ परराष्ट्र मन्त्रालयका एक अधिकारीले भने। “हामीले संयुक्त राष्ट्रका लागि हाम्रा राजदूत र स्थायी प्रतिनिधिलाई पहिले नै हाम्रो अडानबारे जानकारी गराइसकेका छौं र हाम्रो निरन्तर अडानअनुसार रुसी आक्रमणको विरुद्धमा मतदान गर्नेछौं।”
नेपाल सरकारलाई विज्ञप्ति जारी गरी रुसको विलयको निन्दा र भर्त्सना गर्न छुट्टाछुट्टै आह्वान समेत गरिएको छ तर नेपाली पक्षले त्यसो गर्न अस्वीकार गरेको अधिकारीहरुले जनाएका छन्। “संयुक्त राष्ट्रको बडापत्र स्पष्ट छ: धम्की वा बल प्रयोगको परिणामस्वरूप कुनै पनि राज्यको क्षेत्रलाई अर्को राज्यले कब्जा गर्नु संयुक्त राष्ट्र बडापत्र र अन्तर्राष्ट्रिय कानूनको सिद्धान्तको उल्लङ्घन हो,” संयुक्त राष्ट्रका महासचिव एन्टोनियो गुटेरेसले युक्रेनी क्षेत्रहरू रूसमा समावेश गर्न नाटकीय क्रेमलिन समारोहको एक दिन अगाडि सेप्टेम्बर २९ मा भनेका थिए।
The Kathmandu Post बाट अनुवादित।
