काठमाडौं, १६ मंसिर। कैलालीको धनगढीमा सडक दुर्घटनामा १४ वर्षीया बालिकाको मृत्युको विरोधमा विद्यार्थीले शुक्रबार दिउँसो आन्दोलन जारी राखेपछि तनाव बढेको छ।
जिल्ला प्रशासन कार्यालय कैलालीले बिहीबार २४ घन्टा निषेधाज्ञा जारी गरे पनि विद्यार्थीले उक्त आदेशको अवहेलना गर्दै विभिन्न स्थानमा विरोध प्रदर्शन गरिरहेका छन्।
प्रहरीले ५ जना प्रदर्शनकारीलाई पक्राउ गरेको जिल्ला प्रशासन कार्यालयका सूचना अधिकारी शिवराज जोशीले बताए।
बिहीबार बिहान ग्रेडरको ठक्करबाट एक बालिकाको मृत्यु भएपछि उत्रिएको विरोधलाइ रोक्न जिल्ला प्रशासन कार्यालय धनगढीले बिहीबार साँझ ७ बजेदेखि शुक्रबार साँझ ७ बजेसम्मका लागि आदेश जारी गरेको हो।
जिल्ला प्रहरी कार्यालय कैलालीका प्रवक्ता नायब उपरीक्षक वेदप्रकाश जोशीले शान्ति सुरक्षाको अवस्था थप बिग्रन नदिन निषेधाज्ञा जारी गरिएको जानकारी दिए।
पञ्चोदय विद्यालय अभिभावक संघका अध्यक्ष ज्योति भट्टले मृतकका अभिभावकसँग जिल्ला प्रहरी कार्यालयमा छलफल भईरहेको भए पनि विद्यार्थीको सडकमा भएको प्रदर्शन नियन्त्रण बाहिर भइरहेको बताए।
सूचना अधिकारी जोशीले मृतकका अभिभावकलाई कानुनी उपचारका लागि राजी भई आन्दोलनमा नजान आग्रह गरिएको बताए।
‘स्थितिलाई नियन्त्रणमा लिनु सबैको दायित्व हो,’ उनले भने।
